Sinhala

lankacgossip | සහල් මිල ඉහල යන්නේ ලෝක වෙලදපල නිසා නොවේ.. මිල පාලනය නොහැකි ඇයි..


October 15, 2021 at 3:22 am | lankacgossip

සහල් මිල ඉහල යන්නේ ලෝක වෙලදපල නිසා නොවේ.. මිල පාලනය නොහැකි ඇයි..- විමල්

ආනයනික නිෂ්පාදනවල මිල මෙන් නොව සහල් වැනි දේශීය නිෂ්පාදනයන්හි මිල ඉහළ යාමට නොදී සහනදායක මට්ටමක පවත්වාගෙන යාම කළ නොහැක්කක් නොවන බවත් එවැනි ගැටලුවලට මුහුණ දී පිළිතුරු සෙවීමට ආණ්ඩුව සූදානම් බවත් කර්මාන්ත අමාත්‍ය විමල් වීරවංශ මහතා පවසයි.

කඩුවෙල ප්‍රාදේශීය ලේකම් කාර්යාලයේ පැවති සමෘද්ධිලාභී වනිතාවන් පිරිසකට ස්වයංරැකියා උපකරණ බෙදා දීමේ අවස්ථාවකට එක්වෙමින් ඒ මහතා මෙසේ පැවසීය.

එහිදී වැඩිදුරටත් අදහස් දැක්වූ ඒ මහතා මෙසේද සඳහන් කළේය.

“අප පමණක් නොවෙයි දියුණු රටවල් ඇතුළු මුළුමහත් ලෝකයම මෙම වසංගත තත්වය නිසා අනපේක්ෂිත ආර්ථික අර්බුදයන්ට මුහුණ දී සිටිනවා. එවැනි අවස්ථාවකයි මේ රටේ සමෘද්ධි ව්‍යාපාරය හා බද්ධ වී කටයුතු කරන කාන්තාවන්ගේ ජීවනෝපාය මාර්ග වඩාත් දියුණු කර ගැනීම සඳහා කාන්තා හා ළමා සංවර්ධන රාජ්‍ය අමාත්‍යාංශය මගින් මෙසේ ඔවුන්ට ශක්තියක් ලබා දෙන්නේ. එය ඉතා වැදගත්.

අද අපේ රටේ කාන්තාව ශ්‍රම වෙළෙඳපොළ තුළ ඉතා විශාල කාර්යභාරයක් ඉටුකරනු ලබනවා. විශ්වවිද්‍යාල අධ්‍යාපනය තුළ බැලුවත් කාන්තාවගේ සහභාගීත්වය වැඩියි. ඒ වගේම රාජ්‍ය සේවය තුළ බැලුවත් කාන්තා පාර්ශ්වයේ දායකත්වය වැඩියි. ඒ හැම දෙයකින්ම කියැවෙන්නේ අපේ ආර්ථික සංවර්ධන ක්‍රියාදාමයේ දී මීට දශක දෙක තුනකට කලින් කාන්තාවට හිමි තැනට වඩා ප්‍රබල තත්වයක් වර්තමානයේ දී ඇය නියෝජනය කරන බවයි. අපේ ආර්ථික ගමන මෙන්ම ඊළඟ පරම්පරාවේ ගුණ සුවඳ තීරණය වන්නේත් කාන්තාවගේ අතින්.

ආනයනික භාණ්ඩ මිල ඉහළ යාම

මේ මොහොත කියන්නේ අපි කවුරුත් ජීවන බරකට මුහුණ දී සිටින අවස්ථාවක්. මේක සාමාන්‍ය ප්‍රමාණයට වඩා ඇතැම් භාණ්ඩ හා සේවාවන්හි මිල ඉහළ ගිය අවස්ථාවක්. මිල ඉහළ ගිය ඇතැම් භාණ්ඩවල මිල රජයක් හැටියට අපට පාලනය කර ගැනීමට බැරි හේතු තිබෙන්න පුළුවන්. නමුත් සමහර ඒවාට අපට විසඳුම් සෙවිය හැකිව තිබෙනවා. යුරෝපයට ශීත කාලය ළං වන විට ලෝකයේ ගෑස් සහ තෙල් මිල ස්වාභාවිකවම ඉහළ යනවා. මේ වසංගත තත්වයත් සමග එය දෙගුණ තෙගුණ වෙනවා. නැව් ගාස්තු මේ කෙටි කාලය තුළ සියයට 25කින් ඉහළ ගොසින්. ඒ සමගම අපේ රුපියල ක්‍රමානුකූලව කඩා වැටී තිබෙනවා. ඒ සියල්ල බලපානවා අපි ආනයනික නිෂ්පාදන පරිභෝජනයේදී ඒවාගේ මිල තීරණය වීමට.

දේශීය නිෂ්පාදනවල මිල ස්ථාවරව පවත්වා ගැනීම

එහෙත් දේශීය වශයෙන් නිපදවනු ලබන දේවල්වල මිල එසේ ඉහළ යාමට ඉඩ නොදී එක්තරා සහනදායක මට්ටමක පවත්වාගෙන යාමට අපට හැකි විය යුතුයි. එක්දහස්නවසිය හැත්තෑගණන්වල රජයට වී මෝල්, ගබඩා තිබුණා. පසුකාලීනව ඒවා විනාශ වුණා. අද රජය සතුව කිසිදු වී මෝලක්, ගබඩාවක් නැහැ. වී ටික අරගෙන සහල් බවට පත් කරලා දෙන ක්‍රමයක් රජය සතුව නැහැ. ඒ නිසා අද පෞද්ගලික අංශයේ බලවත් මෝල් හිමියන්ට පුළුවන් වී තිබෙනවා අපේ රටේ සහල් මිල තීරණය කිරීමට. ඒවා ලෝක වෙළෙඳපොළේ ප්‍රශ්න සමඟ ගැට ගැසී නැහැ. ඒවා අපට මුහුණ දීලා උත්තර හොයන්න පුළුවන් ප්‍රශ්න.

කොහොම වුණත් මේ දුෂ්කර අවස්ථාවේදී අපි එකිනෙකාට උදව් කර ගනිමින් ඉදිරියට යා යුතුව තිබෙනවා. මෙතැන අද සිදු කෙරෙන්නෙත් එවැනි දෙයක්. මෙතැනදී බෙදා දෙනු ලබන ස්වයංරැකියා උපකරණ නිසි පරිදි භාවිතා කොට තමන් දියුණු වන ගමන් තවත් කෙනෙකුට රැකියාවක් උපදවා දිය හැකිනම් එයයි ඔබට කළ හැකි විශාල ම සේවාව. එසේ කිරීමට ඔබට හැකියාව ලැබේවා’යි පතනවා.”

මෙම අවස්ථාවට කඩුවෙල නගරාධිපති බුද්ධික ජයවිලාල් කඩුවෙල ප්‍රාදේශීය ලේකම්, චතුර මිහිදුම්, දිස්ත්‍රික් සමෘද්ධි අධ්‍යක්ෂ අසේල කුමාර යන මහත්ම මහත්මීහු ඇතුළු පිරිසක් එක්ව සිටියහ.

අනුරුද්ධ බණ්ඩාර රණවාරණ,
මාධ්‍ය ලේකම්,
කර්මාන්ත අමාත්‍යාංශය,

85 views



Source link

Related posts

lankacgossip | සිරිල් ගාමිණි පියතුමන් අත්අඩංගුවට ගැනිමේ සූදානමක්…

Rohan

lankacgossip | උදේට ඇදෙන් නැගිටගන්න පණ නෑ..

Rohan

lankacgossip | කොරෝනා දැනෙන තරමට ඉහල යයි.. ප‍්‍රදේශ වශයෙන් වහන්න සූදානම්..

Rohan

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy